COTEXTE ET CITATION: |
Et quant le gentil homme veid qu'ils estoit descouvert, eut si grand paour d'estre congneu de sa dame, que le plus tost qu'il peust descendit par sa trappe; et autant qu'il avoit eu de desir et d'asseurance d'estre si bien venu, autant estoit-il desesperé de s'en retourner en si mauvais estat. [...] "Beaulté! Tu as maintenant le loyer de ton merite, car, par ta vaine promesse, j'ay entreprins une chose impossible, et qui peut-estre, en lieu d'augmenter mon contentement, est redoublement de mon malheur, estant asseuré que , si elle sçaict que contre la promesse que luy ai faicte, j'ay entreprins ceste follie, je perderay l'honneste et commune frequentation que j'ay plus que nul autre avecq elle [...] Ainsi passa la nuict en tels pleurs, regretz et douleurs qui ne se peuvent racompter. Et, au matin, voiant son visaige si deschiré, feit semblant d'estre fort mallade et de ne povoir veoir la lumiere, jusques ad ce que la compaignye feust hors de sa maison. |