COTEXTE ET CITATION: |
Ainsy se retirerent chacun en sa chambre. Mais, si tost que le Père fut retiré, ne pensa pas à dormir ne reposer; car, incontinant qu'il n'ouyt plus nul bruict en la maison, environ l'heure qu'il avoit accoustumé d'aller à matines, s'en vat le plus doulcement qu'il peut droict en la chambre, et, là, trouvant la porte ouverte de la chambre où le maistre étoit actendu, vat finement estaindre la chandelle, et, le plus tost qu'il ne peut se coucha auprès d'elle, sans jamais luy dire ung seul mot. La damoiselle cuydant que ce fust son mary, luy dit : "Comment mon amy! Vous avez très mal retenu la promesse que feistes hier au soir à nostre confesseur, de ne venir icyjusques deux heures!" Le Cordelier, plus actentif à l'heure à la vie active que à la vie contemplative, avecq la craincte qu'il avoit d'estre congneu, pensa plus à satisfaire au meschant désir dont dès long temps avoit eu le cueur empoisonné, que à luy faire nulle response, dont la dame fut fort estonnée. Et quand le Cordelier veid approcher l'heure que le mary devoit venir, se leva d'auprès de la damoiselle, et, le plus tost qu'il peust, retourna en sa chambre." |